ශ්‍රී ලංකා ගුවන් හමුදාවේ 20 වන ගුවන් හමුදාපති එයාර් මාර්ෂල් වාසු බන්දු එදිරිසිංහ, 1970 ජුනි 20 වන දින මහනුවරදී උපත මහතා මහනුවර සාන්ත සිල්වෙස්තර විද්‍යාලයේ කිර්තිමත් ආදි ශිෂයකු ලෙස පාසල් අධ්‍යාපන කටයුතු හදාරා 1991 වසරේ මැයි මස 03 වන දින අංක 24 වන අධුනික කෙඩෙට් නිළධාරී පාඨමලාවේ කෙඩෙට් නිළධාරියකු ලෙස ශ්‍රී ලංකා ගුවන් හමුදාවට එක්වන ලදි. එයාර් මාර්ෂල් බන්දු එදිරිසිංහ මහතා 1993 වසරේ ජුලි මස 03 වන දින ගුවන් නියමු නිළධාරියකු ලෙස අධිකාරියට පත්ව ගුවන් නියමුවෙකු ලෙස ඔහු සිය වෘත්තිය හමුදා ජිවිතය ආරම්භකරන ලදී.

පුහුණුවිම් සිදු කිරිමෙන් අනතුරුව පියාසර පුහුණුව SF-260 (Warrior) යානයෙන් ලබා ඇති අතර පියාසර උසස් පුහුණුව සදහා ප්‍රවාහන ගුවන් යානා අංශයට යොමු කරන ලදී. ඒ වන විට රටේ පැවති යුධමය තත්වය හේතුවෙන් හෙලිකොප්ටර් නියමුවන් සඳහා වූ අවශ්‍යතාවය හේතුවෙන් ඔහු 1993 දී හෙලිකොප්ටර් යානා පුහුණු සදහා යොමු කරන ලද අතර හෙලිකොප්ටර් නියමුවෙකු ලෙස සාර්ථකව සුදුසුකම් ලැබූ එයාර් මාර්ෂල් වාසු බන්දු එදිරිසිංහ මහතා බෙල් 212 හෙලිකොප්ටර් බලඝණයට අනුයුක්ත කරන ලදී. එහිදී ඔහු ප්‍රධාන ගුවන් නියමුවරයෙකු ලෙස සුදුසුනම් සම්පූර්ණ කොට යුධ සමයේදී ශ්‍රී ලංකාවේ උතුරු හා නැගෙනහිර ගුවන් මෙහෙයුම් සඳහා වැදගත් කාර්යභාරයක් ඉටු කරන ලදී. විශේෂයෙන් 1995 වර්ෂයේදී සතුරු ප්‍රහාර නිසා දැඩි ලෙස අවහිරව තිබූ යාපනයේ පලාලි ප්‍රදේශයේ පියාසර කටයුතු සදහා ස්වේචාවෙන් ඉදිරිපත් වීම මගින් ඔහුගේ චිත්ත ධෛර්ය හා සේවයට ඇති කැපවීම මනාව පිලිබිඹු කරන ලදී. තවද 1997 වර්ෂයේදී පුලියන්කුලම් ප්‍රදේශයේ MI-24 වර්ගයේ හෙලිකොප්ටර් යනයක් හදිසි ගොඩබෑමක් සාර්ථකව සිදු කිරීමට ප්‍රධාන ගුවන් නියමුවරයාට සහාය ලබා දෙමින් සෙසු ගුවන් කාර්යමන්ඩලයේ ජීවිත බේරා ගැනීම ඔහු විසින් සිදු කල වික‍්‍රමාන්විත ක‍්‍රියා අතරින් එකක් පමනි.

1998 වර්ෂයේදී එයාර් මාර්ෂල් වාසු බන්දු එදිරිසිංහ මහතා හිඟුරක්ගොඩ ගුවන් හමුදා කඳවුරේ හෙලිකොප්ටර් උපදේශක පුහුණු පාඨමාලාව සාර්ථකව නිම කරමින් සුදුසුකම් ලත් හෙලිකොප්ටර් උපදේශක වරයෙකු ලෙස සුදුසුකම් ලැබූ අතර රාජකීය ගුවන් හමුදාවේ මධ්‍යම පියාසර පාසලෙන් (Central Flying School) A2 හෙලිකොප්ටර් උපදේශක වරයෙකු ලෙස තවදුරටත් සුදුසුකම් වර්ධනය කරගත් අතර පියාසර පැය 3,000 කට අධික හෙලිකොප්ටර් උපදේශන රාජකාරි සිදුකර ඇත. සමස්තයක් වශයෙන් ඔහු හෙලිකොප්ටර් යානා පියාසර පැය 7,000 කට අධික කාලයක් පියාසර කර ඇති අතර හෙලිකොප්ටර් ක්ෂේත්‍රයේ උපකරණ ශ්‍රේණිගත කිරීමේ විශේෂඥයෙකුද වේ.

ඇමරිකා එක්සත් ජනපදයේ ඇලබාමා හි පිහිටි ගුවන් විශ්ව විද්‍යාලයන් ගුවන් මාණ්ඩලික පාඨමාලාවද චිනයේ ජාතික ආරක්ෂක විද්‍යාලයෙන් ndc පාඨමාලාවද හදාරා ඇති අතර බංග්ලාදේශය, ඉන්දියාව සහ සිංගප්පූරුව වැනි රටවල තවත් විදේශීය පුහුණු වැඩසටහන් රාශියක් සම්පූර්ණ කර ඇත. ඊට අමතරව, ඔහු 2011 දී පකිස්ථානයේ ශ්‍රී ලංකා මහ කොමසාරිස් කාර්යාලයේ ආරක්ෂක නියෝජිතවරයා ලෙස සේවය කරමින් වැදගත් කාර්යය භාර්යයක් ඉටුකරන ලදී.

2003 වර්ෂයේදී එයාර් මාර්ෂල් බන්දු එදිරිසිංහ මහතා ප්‍රභූ ආරක්ෂක (VVIP )පියාසර බලඝණයට නියමුවෙකු වශයෙන් සම්බන්ධ වෙමින් බෙල් 412 සහ 412EP හෙලිකොප්ටර් යානා පිළිබඳ සුවි‍ශේෂී දැනුමක් ලබා ඇත. ගුවන් හමුදා රත්මලාන කඳවුරේ අංක 4 බලඝණය , ගුවන් හමුදා අනුරාධපුර කඳවුරේ අංක 6 බලඝණය සහ ගුවන් හමුදා හිඟුරක්ගොඩ කඳවුරේ අංක 7 හෙලිකොප්ටර් බලඝණවල අණදෙන නීලධාරීවරයා වශයෙන්ද කරයුතු කර ඇත. තවද, ජ්‍යෙෂ්ඨ නිලධාරියෙකු ලෙස, එයාර් මාර්ෂල් වාසු බන්දු එදිරිසිංහ ගුවන් හමුදා අනුරාධපුර කඳවුර, ගුවන් හමුදා හිඟුරක්ගොඩ කඳවුර සහ ගුවන් හමුදා චීන වරාය විද්‍යාපීඨ කවුරුවල අණදෙන නිලධාරී ලෙසත් නැගෙනහිර ගුවන් ආඥාපති ලෙසත් කටයුතු කර ඇත.

ඔහුගේ සුවිශේෂී නිර්භීතකම, විශිෂ්ට සේවය සහ රාජකාරිය සඳහා වූ නොසැලෙන කැපවීම අගයමින් විශිෂ්ඨ සම්මාන කිහිපයක් පිරිනමන ලදී. මෙම සම්මාන අතර තම ජීවිතය පරදුවට තබමින් ක්‍රියාකාරී සේවයේ ස්වේච්ඡාවෙන් සිදු කරන ලද නිර්භීත ක්‍රියාවන් සහ නිර්භීතකම වෙනුවෙන් ඔහුට "වීර වික්‍රම විභූෂණ" සම්මානය පිරිනමන ලදී. සතුරා ඉදිරියේ ස්වේච්ඡාවෙන් සිදු කරන ලද නිර්භීත ක්‍රියාවන් වෙනුවෙන් ඔහුට "රණ වික්‍රම පදක්කම" ද පිරිනමන ලදී. එපමණක් නොව, සතුරා ඉදිරියේ ඔහුගේ කැපී පෙනෙන හැසිරීමට සාක්ෂියක් ලෙස අවස්ථා හතරකදි "රණ සූර පදක්කම" පිරිනමන ලදී. ඔහුගේ සුවිශේෂී සේවය සහ රාජකාරිය කෙරෙහි ඇති කැපවීම අගයමින්, සුවිශේෂී හැකියාව කුසලතා සහ ආදර්ශමත් හැසිරීම මගින් කරන ලද වටිනා සේවය සඳහා පිරිනමන "උත්තම සේවා පදක්කම" ද ඔහුට පිරිනමා ඇත.

ඔහුගේ හමුදා ජීවිතයෙන් ඔබ්බට, එයාර් මාර්ෂල් බන්දු එදිරිසිංහ මහතා ගුවන් හමුදාවේ ක්‍රීඩා උපදේශක කමිටුවේ සාමාජිකයෙකු සහ ශ්‍රී ලංකා ගුවන් හමුදා හොකී සභාපති ලෙස සේවය කර ඇත. ක්‍රිෂාන්ති එදිරිසිංහ ඔහුගේ ආදරණිය බිරිද වේ.

අධ්‍යාපනය / සුදුසුකම් / විශිෂ්ටතා
• ශාඛා පුහුණුව - අංක 01 පියාසර පුහුණු අංශය, ශ්‍රී ලංකා ගුවන් හමුදා කඳවුර අනුරාධපුරය
• කනිෂ්ඨ අණ සහ මාණ්ඩලික පාඨමාලාව, කනිෂ්ඨ අණ සහ මාණ්ඩලික විද්‍යාලය චීනවරාය විද්‍යාපීඨය
• ගුවන් ආරක්ෂක නිලධාරීන්ගේ පාඨමාලාව, බංග්ලාදේශය
• කනිෂ්ඨ අණ සහ මාණ්ඩලික පාඨමාලාව, ඉන්දියාව
• ඒකාබද්ධ උපකරණ ශ්‍රේණිගත කිරීමේ උපදේශක සහ පරීක්ෂක/අණ පරීක්ෂක පාඨමාලාව, ඉන්දියාව
• MI-17 හෙලිකොප්ටරයේ මූලික NVG පරිවර්තනය, ඉන්දියාව
• සෙවීම් සහ මුදාගැනීමේ පරිපාලක පාඨමාලාව, සිංගප්පූරුව
• ගුවන් අණ සහ මාණ්ඩලික පාඨමාලාව, ඇමරිකා එක්සත් ජනපදය
• පියාසර පක්ෂාංග අණදෙන නිළධාරී පාඨමාලාව, චීනය
• MI-17 හෙලිකොප්ටර් සිමියුලේටර් පුහුණුව, ලිතුවේනියාව
• අණදෙන නිලධාරීන්ගේ දිශානති පාඨමාලාව, ඉන්දියාව
• බෙල් 212 සිමියුලේටර් පුහුණුව, ඉන්දියාව
• බංග්ලාදේශයේ MI-17 හෙලිකොප්ටරයේ සිමියුලේටර් පුහුණුව
• ආරක්ෂක සහ උපායමාර්ගික අධ්‍යයන පාඨමාලාව, චීනය

සම්මාන
• වීර වික්‍රම විභූෂණය
• රණ වික්‍රම පදක්කම
• රණ සූර පදක්කම සහ බාර් තුනක්
• උත්තම සේවා පදක්කම
• විදේශ සේවා පදක්කම
• ශ්‍රී ලංකා ගුවන් හමුදාවේ 50 වන සංවත්සර පදක්කම
• ශ්‍රී ලංකා සන්නද්ධ සේවා දිගු සේවා පදක්කම
• සේවාභිමානී පදක්කම
• සේවා පදක්කම
• 50 වන නිදහස් සැමරුම් පදක්කම
• නැගෙනහිර මානුෂීය මෙහෙයුම් පදක්කම
• උතුරු මානුෂීය මෙහෙයුම් පදක්කම
• උතුරු සහ නැගෙනහිර මෙහෙයුම් පදක්කම
• පූර්ණ භූමි පදක්කම
• “මෙහෙයුම් රිවිරේස” මානුෂීය මෙහෙයුම් පදක්කම
• 75 වන නිදහස් සංවත්සර සැමරුම් පදක්කම