ජපන් ලංකා මිත්‍රත්ව සංගමය විසින් නැවතත් ශ්‍රී ලංකා ගුවන් හමුදාව වෙත අද සවස (2021 ඔක්තොම්බර් 05) ගුවන් හමුදා මූලස්ථානයේ පැවති උත්සවයකදී නොමසුරු පරිත්‍යාගයක් සිදු කරන ලදි. ගුවන් හමුදාධිපති එයාර් මාර්ෂල් සුදර්ශන පතිරණ මහතාගේ ප්‍රධානත්වයෙන් පැවති මෙම උත්සවයේ දී ගුවන් හමුදාව වෙත ගිනි නිවන රථ දෙකක් (02) සහ ගිලන් රථයක් පරිත්‍යාග කරන ලදි.

වෛද්‍ය ලාල් තිලකරත්න මහතාගේ සහ ජපන් ලංකා මිත්‍රත්ව සංගමයේ නොපසුබට උත්සාහය මත ගුවන් හමුදාවට මෙම නිර්ලෝභී පරිත්‍යාගය ලැබී ඇති අතර ඔවුන් කොවිඩ්-19 වසංගත තත්ත්වය හේතුවෙන් බොහෝ සීමා කිරීම් මධ්‍යයේ වුවද මෙම වාහන ගෙන්වා ගැනීමට අවශ්‍ය සියලු කටයුතු සිදු කළේය.

වසංගත තත්ත්වය හේතුවෙන් ජපන් ලංකා මිත්‍රත්ව සංගමයේ නිලධාරීන්ට මෙම උත්සවය සඳහා සහභාගි වීමට නොහැකි විය. කෙසේ වෙතත් මාර්ගගත  තාක්‍ෂණය භාවිතයෙන් ආචාර්ය ලාල් තිලකරත්න මෙම උත්සවයට සම්බන්ධ වූ අතර සම්පූර්ණ උත්සවයේ වැඩකටයුතු නැරඹීමට ඔහුට හැකි විය. මෙම අවස්ථාවට ගුවන් මෙහෙයුම් අධ්‍යක්ෂක එයාර් වයිස් මාර්ෂල් කපිල වනිගසූරිය, සෞඛ්‍ය සේවා අධ්‍යක්ෂක එයාර් වයිස් මාර්ෂල් වෛද්‍ය ලලිත් ජයවීර, ගුවන් හමුදා ප්‍රධාන ගිනි නිවාරණ නිලධාරී ගෲප් කැප්ටන් සංජය විතාන සහ ගුවන් හමුදා මූලස්ථානයේ නිලධාරීන් කිහිප දෙනෙකු සහභාගී විය. කොවිඩ්-19 වැළැක්වීම සඳහා වන සෞඛ්‍ය මාර්ගෝපදේශයන්ට අනුකූලව මෙම උත්සවය පැවැත්විණි.