කණුගහවැව ආදර්ශ ගම්මානයේ අලි වැට ව්‍යාපෘතිය අවසන් කර මහජනතාවට සහ වනජීවී සංරක්ෂණ දෙපාර්තමේන්තුව වෙත ඊයේ (2022 මැයි 10) දිනයේදී මොරවැව ගුවන් හමුදා කඳවුරු අණදෙන නිලධාරී ගෲප් කපිතාන් ලලිත් සුගතදාස මහතා විසින් පවරා දෙන ලදී. ප්‍රජා සේවා ව්‍යාපෘතියක් ලෙස ගුවන් හමුදාධිපති එයාර් මාර්ෂල් සුදර්ශන පතිරණ මහතාගේ උපදෙස් පරිදි මොරවැව ගුවන් හමුදා කඳවුර විසින් මෙම ඉදිකිරීම් ව්‍යාපෘතිය සිදු කරන ලදී.

කිලෝමීටර් 14ක් දිගැති මෙම අලි වැටෙන් පවුල් 314කට තම ජීවිත, දේපළ හා කුඹුරු වන අලි කරදරවලින් ආරක්ෂා කර ගැනීමට පහසුකම් සැලසේ. අලි ඇතුන්ගෙන් වගාවන්ට සිදු විය හැකි සැලකිය යුතු හානිය වැළැක්වීමට සහ අලි ඇතුන් සහ ගොවීන් අතර ගැඹුරින් මුල් බැස ඇති ගැටුම නැවැත්වීමට මෙය ඉමහත් උපකාරයක් වනු ඇත. මොරවැව ගුවන් හමුදා කඳවුරේ භට පිරිස් විසින් මාස හතරක් ඇතුළත මෙම කාර්යය නිම කරන ලදී.