ලෝක ළමා දිනය නිමිත්තෙන් ගුවන් හමුදාධිපති එයාර් මාර්ෂල් සුදර්ශන පතිරණගේ මගපෙන්වීම යටතේ ගුවන් හමුදා සේවා වනිතා ඒකකයේ සභාපතිනී චාමිණි පතිරණ මහත්මියගේ සංකල්පයකට අනුව ගුවන් හමුදා සේවා වනිතා ඒකකය විසින් සියලුම ගුවන් හමුදා කඳවුරුවල "ළමා දින" වැඩසටහන් මෙහෙයවන ලදී. පසුගිය කාලසීමාව තුළ රට තුළ ඇති වූ වසංගත තත්ත්වය සහ අනෙකුත් නොසන්සුන්තා හේතුවෙන් නිවෙස්වලට සීමා වී සිටි දරුවන්ගේ ඒකාකාරී බව දුරු කිරීමේ අරමුණින් මෙම උත්සවය සංවිධානය කර තිබුණි. ප්‍රධාන උත්සවය ඊයේ (2022 ඔක්තෝම්බර් 02) දින ගුවන් හමුදාධිපතිතුමන්ගේ සහ ගුවන් හමුදා සේවා වනිතා ඒකකයේ සභාපතිනියගේ ප්‍රධානත්වයෙන් රත්මලාන ගුවන් හමුදා කෞතුකාගාරයේදී පැවැත්විණි. ගුවන් හමුදා රත්මලාන කඳවුරු අණදෙන නිලධාරි එයාර් වයිස් මාර්ෂල් නිහාල් ජයසිංහ මහතාගේ අධීක්ෂණය යටතේ මෙම උත්සවය සංවිධානය කර ඇත.

ගුවන් හමුදාධිපතිතුමන් සහ සේවා වනිතා ඒකකයේ සභාපතිනී චාමිණි පතිරණ මහත්මිය කෞතුකාගාර පරිශ‍්‍රයට පැමිණීමෙන් අනතුරුව උත්සවය ආරම්භ වු අතර ඔවුන් පිළිගනු ලැබුවේ මිලාගිරිය ශාන්ත පාවුළු බාලිකා විද්‍යාලයේ දරු දැරියන් විසිනි. අනතුරුව රත්මලාන ගුවන් හමුදා පෙර පාසලේ පහළ බාලාංශයේ සහ ඉහළ බාලාංශයේ දරු දැරියන්, විශාඛා විද්‍යාලය, ශාන්ත තෝමස් විද්‍යාලය සහ මියුසියස් විද්‍යාලයේ සිසු සිසුවියන් සිය දක්ෂතා ප්‍රදර්ශනය කරමින් උත්සවයට තවත් ආකර්ෂණයක් එක් කළහ. සංගීත සංදර්ශනයක්, ගුවන් සුනඛ සංදර්ශනයක්, මැජික් සංදර්ශනයක්, ත්‍රාසජනක ක්‍රීඩා, ළමා ක්‍රීඩා පිටියක් සහ ක්‍රීඩා මධ්‍යස්ථාන කලාපයක් මෙම උත්සවයට ඇතුළත් වු අතර මෙම අවස්ථාවට තරුණ තරුණියන් 450 කට වැඩි පිරිසක් සහභාගී වූහ. මීට අමතරව, රත්මලාන ගුවන් හමුදා රෝහල මගින් වෛද්‍ය පරීක්‍ෂණයක් සහ මහරගම දන්ත චිකිත්සක පුහුණු පාසල මගින් දන්ත වෛද්‍ය පරීක්‍ෂණයක් උත්සවය ආරම්භයට පෙර සියලුම දරුවන් සඳහා නොමිලේ සංවිධානය කරන ලදී.

මෙම ප්‍රීතිමත් සන්ධ්‍යාව සඳහා ගුවන් හමුදා මාණ්ඩලික ප්‍රධානී, ගුවන් හමුදා අධ්‍යක්ෂක මණ්ඩලයේ සාමාජිකයින්, ගුවන් හමුදා රත්මලාන කඳවුරේ අණදෙන නිලධාරිතුමන්, ගුවන් හමුදා රත්මලාන කඳවුරේ සේවා වනිතා ඒකකයේ සභාපතිනි එෂානි ජයසිංහ මහත්මිය, රත්මලාන ගුවන් හමුදා කෞතුකාගාරයේ අණදෙන නිලධාරී එයාර් කොමදෝරු චරිත් බෝධිසීල, සේවා වනිතා ඒකකයේ ලේකම් විංග් කමාන්ඩර් සුරේෂ් ප්‍රනාන්දු ඇතුළු සේවා වනිතා ඒකකයේ සාමාජිකයින් සහ රත්මලාන කඳවුරේ සියලුම සාමාජිකයින් මෙම අවස්ථාවට සහභාගිවිය.