අංක 74 කනිෂ්ඨ අණ හා මාණ්ඩලික පාඨමාලාවේ උපාධි ප්‍රදානෝත්සවය ඊයේ (2023 දෙසැම්බර් 12) ශ්‍රී ලංකා ගුවන් හමුදා චීන වරාය විද්‍යාපීඨයේ පිහිටි කනිෂ්ඨ අණ හා මාණ්ඩලික විද්‍යාල ශ්‍රවණාගාරයේදී පැවැත්විණි. මෙම අවස්ථාවට ප්‍රධාන ආරාධිත අමුත්තා ලෙස ගුවන් ඉංජිනේරු අධ්‍යක්ෂ ජනරාල් එයාර් වයිස් මාර්ෂල් මුදිත මහවත්තගේ මහතා සහභාගි වූ අතර උත්සවයේ ප්‍රධාන ආරාධිතයා ලෙස පුහුණු අධ්‍යක්‍ෂ ජනරාල් එයාර් වයිස් මාර්ෂල් ලසිත සුමනවීර මහතාද සහභාගි විය.

මෙම උත්සවය සති 14 ක් පුරා පැවති පාඨමාලාවේ අවසානය සනිටුහන් කරමින් නිලධාරීන් 23 දෙනෙකු සහභාගී වූ අතර, ඉන් 20 දෙනෙකු ගුවන් හමුදා ස්කොඩ්‍රන් ලීඩර් සහ ෆ්ලයිට් ලෙෆ්ටිනන්ට් නිලයන්, ශ්‍රී ලංකා නාවික හමුදාවේ නිලධාරීන් දෙදෙනෙකු සහ සැම්බියානු ගුවන් හමුදාවට අයත් එක් නිලධාරියෙකු විය.

කනිෂ්ඨ අණ හා මාණ්ඩලික විද්‍යාලය ජෙනරාල් ශ්‍රීමත් ජෝන් කොතලාවල ආරක්ෂක විශ්වවිද්‍යාලයට අනුබද්ධ කර ඇති අතර අවශ්‍ය නිර්ණායක සපුරාලන නිලධාරීන්ට ආරක්ෂක කළමනාකරණය පිළිබඳ පශ්චාත් උපාධි ඩිප්ලෝමාවක් පිරිනැමේ.