ශ්‍රී ලංකා ගුවන් හමුදා සීගිරිය කඳවුර විසින් 2023 දෙසැම්බර් 17 වන දින ආරම්භ කරන ලද දඹුල්ල ප්‍රාථමික විද්‍යාලයේ ප්‍රතිසංස්කරණ ව්‍යාපෘතිය සාර්ථකව නිම කිරීමෙන් පසු  භාරදීම  උත්සවය 2024 ජූලි 22 වන දින පාර්ලිමේන්තු මන්ත්‍රී, ගරු. ජනක බණ්ඩාර තෙන්නකෝන් මහතා සහ ආරක්ෂක රාජ්‍ය අමාත්‍ය ගරු. ප්‍රේමිත බණ්ඩාර තෙන්නකෝන් මහතාගේ ප්‍රධානත්වයෙන් පැවැත්විණි.

මෙම සුවිශේෂී ප්‍රයත්නයට සහය දැක්වීම සඳහා කටුනායක ගුවන් හමුදා කඳවුරේ සිවිල් ඉංජිනේරු අංශයේ දක්ෂ ගුවන් භටයින් 23 දෙනෙකු ශ්‍රම සහය ලබා දීම සඳහා අනුයුක්ත කරන ලදී. ඉදිකිරීම් ඉංජිනේරු අධ්‍යක්‍ෂ ජනරාල් එයාර් වයිස් මාර්ෂල් චන්දන ගීතප්‍රිය මහතාගේ උපදෙස් මත ව්‍යාපෘති භාර නිලධාරි, ස්කොඩ්‍රන් ලීඩර් කොස්මෝ රවීන්ද්‍රනාත් නිළධාරීතුසන්ගේ අධීක්ෂණය යටතේ මෙම ව්‍යාපෘතිය  සිදුකරන ලදී. ගොඩනැගිලි හතක් ප්‍රතිසංස්කරණය කිරීම, වැසිකිළි සංකීර්ණයක් ප්‍රතිසංස්කරණය කිරීම සහ නව එකලස් කිරීමේ ප්‍රදේශයක්, වාහන නැවතුම් අංගනයක්, ඉංග්‍රීසි කාමරයක්, ළමා උද්‍යානයක් සහ ප්‍රධාන වේදිකාවක් ඉදිකිරීම මෙම ව්‍යාපෘතිය ඇතුළත් විය.

මෙම අවස්ථාවට ගුවන් හමුදා සීගිරිය කදවුරේ අණදෙන නිළධාරී ගෲප් කැප්ටන් එස්.වී ප්‍රේමවර්ධන, ගුවන් හමුදා සීගිරිය කදවුරේ නිළධාරීන් සහ ගුවන් භටයින්, රාජ්‍ය නිළධාරීන්, විද්‍යාල විදුහල්පති, ගුරුවරුන්, සිසුන් සහ අනෙකුත් ගෞරවනීය ආරාධිත අමුත්තන් රැසක් සහභාගී විය.