අන්තර් ඒකක මේසපන්දු ශූරතාවලිය 2024 අගෝස්තු 14 සිට 15 වන දින දක්වා කොළඹ ශ්‍රී ලංකා ගුවන් හමුදා සෞඛ්‍ය කළමනාකරණ මධ්‍යස්ථානයේදී පැවැත්විණි. මෙවර පිරිමි සහ කාන්තා යන ඉසව් දෙකටම සැලකිය යුතු ක්‍රීඩක ක්‍රීඩිකාවන් සංඛ්‍යාවක් සහභාගි වූ අතර, මෙම තරගාවලියේදී යොවුන්, දක්ෂ ක්‍රීඩකයන් රැසක් හඳුනා ගැනීමට හැකි විය. අවසන් සැසිවාරය සහ සම්මාන ප්‍රදානෝත්සවය 2024 අගෝස්තු 15 වන දින ශ්‍රී ලංකා ගුවන් හමුදා  කොළඹ සෞඛ්‍ය කළමනාකරණ මධ්‍යස්ථානයේදී පැවැත්වුණු අතර එහි ප්‍රධාන ආරාධිත අමුත්තා ලෙස සැපයුම් අධ්‍යක්ෂ ජනරාල් එයාර් වයිස් මාර්ෂල් දීපාල් මුණසිංහ මහතා සහභාගී විය.

ශ්‍රී ලංකා මේසපන්දු සංගමයේ (TTASL) නීතිරීතිවලට අනුකූලව අන්තර් ඒකක මේසපන්දු තරඟාවලිය පිරිමි සහ කාන්තා යන දෙඅංශයෙන්ම සංවිධානය කරන ලදී. සමස්ත පිරිමි කණ්ඩායම් ශූරතාව ගුවන් හමුදා රත්මලාන කඳවුර විසින් දිනා ගන්නා ලද අතර අනුශූරතාව ශ්‍රී ජයවර්ධනපුර කෝට්ටේ ගුවන් හමුදා කඳවුර විසින් දිනා ගන්නා ලදී.

මෙම උත්සවය සඳහා ක්‍රීඩා අධ්‍යක්ෂ, එයාර් කොමදෝරු ඩබ්ලිව්ඒඑස්බී වීරසේකර, ගුවන් හමුදා මේසපන්දු සංචිත සභාපති එයාර් කොමඩෝර් එම්එෆ් ජැන්සන්, ගුවන් හමුදා ක්‍රීඩා කවුන්සිලයේ සාමාජිකයින් සහ අනෙකුත් ආරාධිතයින් ඇතුළු සම්භාවනීය අමුත්තන් රැසක් සහභාගී වූහ.