ගැබිනි සමය සඳහා අනාගත මව්වරුන් සූදානම් කිරීම සහ දරු ප්‍රසූතියෙන් පසු අලුත උපන් බිළිඳා රැකබලා ගැනීම සඳහා ගුවන් හමුදා කටුනායක රෝහල විසින් ගුවන් හමුදාවේ සේවය කරන දරුවන් අපේක්ෂා කරන මව්වරුන් සඳහා පූර්ව ප්‍රසව ඉගැන්වීම් සැසියක් සංවිධානය කර ඇත. ගුවන් හමුදා කටුනායක කඳවුරේ සියලුම ගැබිණි ගුවන් කාන්තාවන් ගුවන් භටයින්ගේ තවත් ගැබිනි කලත්‍රයන් කිහිප දෙනෙකු සමඟ වැඩසටහනට සහභාගී විය.

2024 නොවැම්බර් 21 දින කටුනායක ගුවන් හමුදා රෝහලේ අණදෙන නිළධාරීතුමන්ගෙ උපදෙස් මත මෙම වැඩසටහන පවත්වන ලදී. සහභාගී වූවන්ගේ විවිධ ධනාත්මක ප්‍රතිචාර සමඟ සාර්ථකව වැඩසටහන අවසන් විය.

කටුනායක ගුවන් හමුදා රෝහලේ සායනික මනෝවිද්‍යාඥ විංග් කමාන්ඩර් ඒ.එච්.එස් ප්‍රේමරත්න විසින් ගර්භණි අවධියේදී සිහිකල්පනාව පිළිබඳ උපදේශන සැසියක් සමඟින් වැඩසටහන ආරම්භ කරන ලදී. ගර්භනී සමයේ පෝෂණ අවශ්‍යතා පිළිබඳ සවිස්තරාත්මක සැසියක් පෝෂණවේදී බලඝණ නායක ටීඑම්එස් තිලකරත්න  විසින් පවත්වන ලදී. ගුවන් හමුදා කටුනායක රෝහලේ වෛද්‍ය නිලධාරී ජේ.ඒ.ඒ.එස්. විජේසිංහ විසින් ගර්භණීභාවය හා එහි ඇති පොදු සංකූලතා පිළිබඳ දැනුම බෙදාගැනීම, ගැබ් ගැනීම පිළිබඳ සැක සහ මිථ්‍යාවන් නිවැරැදි කිරීම පිළිබඳ දැනුවත් කිරීමේ සැසියක් සමඟින් වැඩසටහන අවසන් කරන ලදී.

වැඩසටහන අවසානයෙ  නැවුම් පලතුරුවලින් සමන්විත පෝෂ්‍යදායී රසැති කෙටි ආහාරයක් පිරිනැමූ අතර වැඩසටහනට සහභාගි වූ සියලුම දෙනාට අත්‍යවශ්‍ය ළදරු නිෂ්පාදනවලින් සමන්විත වටිනා තෑගි මල්ලක් ද ලබා දෙන ලදී.