ශ්‍රී ලංකා ගුවන් හමුදාව සහ මොන්ටානා ජාතික ආරක්ෂක බළකාය අතර රසායනික ජීව විද්‍යාත්මක විකිරණ සහ න්‍යෂ්ටික (CBRN) ප්‍රතිචාර, පුපුරණ ද්‍රව්‍ය නිෂ්ක්‍රීය කිරීම (EOD) සහ සමුද්‍රීය වරාය ප්‍රතිසාධන විශේෂඥ දැනුම හුවමාරුව පිළිබඳ වැඩසටහන කටුනායක ගුවන් හමුදා කඳවුරේදී සාර්ථකව අවසන් විය.

ශ්‍රී ලංකා ගුවන් හමුදාවේ අංක 49 රසායනික ජීව විද්‍යාත්මක විකිරණශීලී න්‍යෂ්ටික පුපුරණ ද්‍රව්‍ය (CBRNE) පක්‍ෂාංගය විසින් CBRN ප්‍රතිචාර, පුපුරණ ද්‍රව්‍ය නිෂ්ක්‍රීය කිරීම (EOD) සහ සමුද්‍රීය වරාය ප්‍රතිසාධන යන විෂය කරුණු පිළිබඳ විශේෂඥ දැනුම හුවමාරුව පිළිබඳ ශ්‍රී ලංකා ගුවන් හමුදාව සහ මොන්ටානා ජාතික ආරක්ෂක බළකාය අතර වැඩසටහන 2024 නොවැම්බර් 18 වන දින සිට 2024 නොවැම්බර් 22 වන දින දක්වා පවත්වන ලද වැඩසටහන ගුවන් හමුදා කටුනායක කඳවුරු වැඩබලන අණදෙන නිළධාරී එයාර් වයිස් මාර්ෂල් රජින්ත් ජයවර්ධන නිළධාරීතුමන්ගේ ප්‍රධානත්වයෙන් හා අංක 49 රසායනික ජීව විද්‍යාත්මක විකිරණශීලී න්‍යෂ්ටික පුපුරණ ද්‍රව්‍ය පක්ෂාංගයේ අණදෙන නිලධාරී ගෲප් කපිතාන් නිලේන්ද්‍ර පෙරේරා ගේ මගපෙන්වීම යටතේ මෙම වැඩසටහන ආරම්භ කරන ලදී.

මෙම අවස්ථාවට ශ්‍රී ලංකා ගුවන් හමුදාවේ සහ ශ්‍රී ලංකා නාවික හමුදාවේ මෙන්ම ශ්‍රී ලංකා පරමාණුක බලශක්ති නියාමන සභාව, රසායනික අවි ප්‍රඥප්තිය ක්‍රියාත්මක කිරීමේ ජාතික අධිකාරිය, සෞඛ්‍ය අමාත්‍යාංශය, මධ්‍යම පරිසර අධිකාරිය, සමුද්‍ර පරිසර ආරක්ෂණ අධිකාරිය, ගුවන් තොටුපළ සහ ගුවන් සේවා අධිකාරිය යන ආයතනවල නියෝජිතයන් ද එක්ව සිටියහ.