ශ්‍රී ලංකා ගුවන් හමුදාව ශ්‍රී ලංකා රජරට විශ්ව විද්‍යාලය (RUSL) සමග එක්ව 2024 දෙසැම්බර් 09 වන දින රජරට විශ්වවිද්‍යාලයේ කළමනාකරණ පීඨයේදී අවබෝධතා ගිවිසුමක් අත්සන් කරන ලද අතර, අධිකාරී නොලත් නිලධාරීන් පුහුණු කිරීමේදී සැලකිය යුතු සහයෝගීතාවයක් මෙයින් සනිටුහන් කරන ලදී. වැඩබලන අණදෙන නිළධාරී, ගෲප් කැප්ටන් අසේල කුරුවිට නිළධාරීතුමන් මෙම අවස්ථාවට ප්‍රධානත්වය දුන් අතර රජරට විශ්ව විද්‍යාලය උපකුලපති, මහාචාර්ය ජී.ඒ.එස්. ගිංගද්දර, විශ්වවිද්‍යාල නියෝජිතයින්ගේ ප්‍රධානත්වය දැරූහ.

අධිකාරී නොලත් නිළධාරීන්ගේ කළමනාකරණ පාඨමාලාව සහතික මට්ටමේ සිට ඩිප්ලෝමා මට්ටම දක්වා ඉහළ නැංවීම මෙම අවබෝධතා ගිවිසුමේ අරමුණ වේ. මෙම ගිවිසුම මගින් ශ්‍රී ලංකා ගුවන් හමුදා උපදේශකවරුන්ට අමතරව විශ්වවිද්‍යාල කථිකාචාර්යවරුන්ගෙන් ඔවුන්ගේ කළමනාකරණ කුසලතා පුහුණු කිරීම සඳහා අධිකාරී නොලත් නිලධාරීන්ට නව දැනුම ලබා ගැනීමේ අවස්ථා වැඩි දියුණු කිරීමට උපකාරී වනු ඇත.

මෙම අවස්ථාවට රෙජිමේන්තු පුහුණු පක්ෂාංගයේ අණදෙන නිලධාරී, ගෲප් කැප්ටන් නිරෝෂ සේනාධීර, අධිකාරී නොලත් නිලධාරීන්ගේ කළමනාකරණ පාසලේ අණදෙන නිලධාරී, විංග් කමාන්ඩර් දිනේෂ් හතුරුසිංහ සහ අධිකාරී නොලත් නිලධාරීන්ගේ කළමනාකරණ පාසලේ ප්‍රධාන උපදේශක ස්කොඩ්‍රන් ලීඩර් එස්.එම්.කේ.පී සමරකෝන් යන නිළධාරීන් එක්ව සිටියහ.