26 වනවරටත් පවත්වනු ලබන ගුවන් හමුද පාපැදි සවාරිය 2025, 2025 පෙබරවාරි 28 වන දින උදෑසන වීරවිල ගුවන් හමුදා කඳවුර ඉදිරිපිටදී ගුවන් මෙහෙයුම් අධ්‍යක්ෂ ජෙනරාල් සහ හිටපු ගුවන් හමුදා පාපැදි සම්මේලන සභාපති එයාර් වයිස් මාර්ෂල් ලසිත සුමනවීර මහතාගේ ප්‍රධානත්වයෙන් ආරම්භ කරන ලදී. මෙම අවස්ථාවට ක්‍රීඩා අධ්‍යක්ෂ ජෙනරාල් රියර් අද්මිරාල් ෂෙමාල් ප්‍රනාන්දු මහතා සහභාගී විය. අද ආරම්භ වූ මෙම වසරේ තරඟය 74 වන සංවත්සරයට සමගාමීව පවත්වනු ලැබේ.

ඉන්දියානු ගුවන් හමුදාව නියෝජනය කරමින් පුද්ගලයින් පස් දෙනෙකුගෙන් යුත් කණ්ඩායමක් ඇතුළුව, දේශීය හා විදේශීය පිරිමි 150 කට අධික සංඛ්‍යාවක් සහභාගී වූ අද උදෑසන ආරම්භ වූ පිරිමි තරඟය, කිලෝමීටර් 145 ක දුරක් ආවරණය කරමින් රත්නපුරයේදී එහි පළමු වටය සම්පූර්ණ කිරීමට නියමිතය. තරඟය දින තුනකින් සම්පූර්ණ කිරීමෙන් පසු 2025 මාර්තු 02 වන දින කොළඹදී අවසන් වේ.

කාන්තා තරඟය 2025 මාර්තු 02 වන දින මීරිගමින් ආරම්භ වී කොළඹදී අවසන් වීමට නියමිත අතර එය ආසන්න වශයෙන් කිලෝමීටර 86 ක දුරක් ආවරණය කරයි. කාන්තා තරඟය සඳහා මාර්ගය ගිරිඋල්ල, දන්කොටුව, ජා-ඇල හරහා අවසන් ස්ථානය දක්වා ගමන් කරනු ඇත.

සම්මාන උළෙල 2025 මාර්තු 02 වන දින රයිෆල් ග්‍රීන් පිටියේදී පැවැත්වීමට නියමිතව ඇත..

මෙම වසරේ තරඟය ගුවන් හමුදා පාපැදි සංගමයේ සභාපති එයාර් වයිස් මාර්ෂල් ඉන්දික වික්‍රමසිංහ මහතාගේ නායකත්වයෙන් සහ ගුවන් හමුදා පාපැදි සංගමයේ ලේකම් ගෲප් කැප්ටන් රංග පෙරේරා මහතාගේ සම්බන්ධීකරණය යටතේ ගුවන් හමුදා පාපැදි සංගමය විසින් සංවිධානය කරන ලදී.