එයාර් වයිස් මාර්ෂල් එච්ඩබ්ලිව්ආර් චන්දිමආර්ඩබ්ලිව්පී, ආර්එස්පී, යූඑස්පී, එම්එස්සී (එම්ජීටී), එන්ඩීසී, සාම විනිසුරු
එයාර් වයිස් මාර්ෂල් හල්ගහ විතානගේ රුවන් චන්දිම, කොළඹ ප්‍රදේශයේ උපත ලබා, කළුතර මහා විද්‍යාලයේ අධ්‍යාපනය අවසන් කිරීමෙන් පසු 1993 දී කැඩෙට් නිලධාරියෙකු ලෙස සිය හමුදා ජීවිතය ආරම්භ කළේය. ඔහු දියතලාව ගුවන් හමුදා සටන් පුහුණු පාසලේ මූලික ගොඩබිම් සටන් පුහුණුව සහ ගුවන් හමුදා චීන වරාය විද්‍යාපීටයේ මූලික පරිපාලන පාඨමාලාව සාර්ථකව සම්පූර්ණ කර ඇත. 1994 සැප්තැම්බර් 23 වන දින, ඔහු පරිපාලන රෙජිමේන්තු ශාඛාවේ නියමු නිලධාරියෙකු ලෙස අධිකාරියට පත් වී, ශ්‍රී ලංකා ගුවන් හමුදාවේ නිලධාරියෙකු ලෙස විශිෂ්ට වෘත්තීය ජීවිතයක් ආරම්භ කරන ලදී.
එයාර් වයිස් මාර්ෂල් චන්දිම, කීර්තිමත් හමුදා සහ රාජ්‍ය තාන්ත්‍රික පුහුණු වැඩසටහන් රාශියක් හරහා තම වෘත්තීය වර්ධනයට දැඩි කැපවීමක් පෙන්නුම් කර ඇත. 2002 දී ශ්‍රී ලංකාවේ කනිෂ්ඨ අණ හා මාණ්ඩලික පාඨමාලාව සාර්ථකව නිම කිරීම සහ පකිස්ථානයේ මූලික මාණ්ඩලික පාඨමාලාවේ නියැලීම ඔහුගේ උපායමාර්ගික විශේෂඥතාව තවදුරටත් වැඩි දියුණු කරන ලද අතර. 2011 දී වෘත්තීය රාජ්‍ය තාන්ත්‍රිකභාවය පිළිබඳ ඩිප්ලෝමා පාඨමාලාව, 2014 දී ඉන්දියාවේ ජ්‍යේෂ්ඨ අණ හා මාණ්ඩලික පාඨමාලාව, 2018 දී ඇමරිකාවේ උසස් ආරක්ෂක සහයෝගීතා පාඨමාලාව සහ 2023 දී ශ්‍රී ලංකා ජාතික ආරක්ෂක විද්‍යාලයේ ජාතික ආරක්ෂක සහ උපායමාර්ගික අධ්‍යයන පාඨමාලාවන් සාර්ථකව නිම කර ඇත.
දැඩි පුහුණුව සහ වෘත්තීය සුදුසුකම් තුළින් විශේෂිත හමුදා ක්ෂේත්‍රවල විශේෂඥතාව ඉදිරියට ගෙන යාමේදී, ඔහු නිරන්තරයෙන් සුවිශේෂී කැපවීමක් පෙන්නුම් කර ඇති අතර 2001 දී, ඔහු පුපුරණ ද්‍රව්‍ය නිෂ්ක්‍රීය කිරීමේ (EOD) මූලික පාඨමාලාව සාර්ථකව සම්පූර්ණ කර ඇත. එමෙන්ම, ශ්‍රී ලංකාවේ ගොඩබිම් පාදක ගුවන් ආරක්ෂක පාඨමාලාව හදාරා ඇත.
එයාර් වයිස් මාර්ෂල් රුවන් චන්දිම නිළධාරීතුමන්ගේ කීර්තිමත් හමුදා ජීවිතය පුරාවට, ඔහුගේ නිර්භීත ක්‍රියාවන් සහ ආදර්ශමත් සේවය වෙනුවෙන් කීර්තිමත් සම්මාන සහ පිළිගැනීම් වලින් ගෞරව කර ඇත. සතුරා හමුවේ සුවිශේෂී නිර්භීත ක්‍රියාවන් සඳහා ඔහුට 'රණ වික්‍රම පදක්කම (RWP)' සහ 'රණ සුර පදක්කම (RSP)' පිරිනමන ලද අතර වෘත්තීයභාවය සහ අඛණ්ඩතාවයේ ඉහළම ප්‍රමිතීන් ආරක්ෂා කිරීම සඳහා ඔහුගේ කැපවීම වෙනුවෙන් 'උත්තම සේවා පදක්කමද (USP)'පිරිනමා ඇත.
එයාර් වයිස් මාර්ෂල් රුවන් චන්දිම නිළධාරීතුමන්ගේ ගුවන් හමුදාවේ වෘත්තීය ජීවිතය පුරා, අම්පාර ගුවන් හමුදා කඳවුර, කටුකුරුන්ද ගුවන් හමුදා කඳවුර, මොරවැව ගුවන් හමුදා කඳවුර, පලාලි ගුවන් හමුදා කඳවුර, කොළඹ ගුවන් හමුදා කඳවුර, චීන වරාය ගුවන් හමුදා විද්‍යාපීඨයේ රෙචිමේන්තු පුහුණු පක්ෂාංගය, අංක 45 VIPP පක්ෂාංගය සහ අංක 26 රෙජිමේන්තු පක්ෂාංගයේ අණදෙන නිලධාරී ලෙස ප්‍රධාන තනතුරු රැසක සේවය කළ ඇත.
එයාර් වයිස් මාර්ෂල් රුවන් චන්දිම මහතා අනූෂා දර්ශි මහත්මිය සමඟ විවාහ වී සිටින අතර ගිනුර, ගවේෂ් සහ ඉසාලි පුතුන් දෙදෙනෙකු හා දියණියකගේ ආදරණීය පියෙකු වේ.
