එයාර් වයිස් මාර්ෂල් එල් ආර් ජයවීරVSV, USP, MBBS (SL), Msc (D&SS),
Dip Av Med (USA), psc
එයාර් වයිස් මාර්ෂල් ලලිත් රුක්මන් ජයවීර මහතා මූලික අධ්‍යාපනය ගාල්ල ශාන්ත ඇලෝසියස් විද්‍යාලයෙන් ද ද්විතීයික අධ්‍යාපනය ගාල්ල රිච්මන්ඩ් විද්‍යාලයෙන් ද ලබා ඇත. ඔහු රුහුණු විශ්වවිද්‍යාලයේ වෛද්‍ය පීඨයේ උපාධිධාරියෙකි.
එයාර් වයිස් මාර්ෂල් ලලිත් ජයවීර 1994 අප්‍රේල් 03 වැනි දින ශ්‍රී ලංකා ගුවන් හමුදාවට බැඳුණු අතර ඔහුට “විශිෂ්ට සේවා විභූෂණ”, “උත්තම සේවා පදක්කම”, උතුරු නැගෙනහිර මෙහෙයුම් පදක්කම, පූර්ණ භූමි පදක්කම, සන්නද්ධ හමුදා දිගු සේවා පදක්කම, රිවිරැස නිදහස් පදක්කම, උතුරු මානුෂීය පදක්කම, 50 වැනි පදක්කම, නැගෙනහිර මානුෂීය පදක්කම සහ එක්සත් ජාතීන්ගේ සේවා පදක්කම පිරිනමා ඇත.
එයාර් වයිස් මාර්ෂල් ලලිත් ජයවීර මහතා සෞඛ්‍ය සේවා අධ්‍යක්ෂ කාර්යාලයේ ජ්‍යෙෂ්ඨ මාණ්ඩලික නිලධාරියා ලෙසත් ශ්‍රී ලංකා ගුවන් හමුදා කටුනායක රෝහලේ සහ ශ්‍රී ලංකා ගුවන් හමුදා රත්මලාන රෝහලේ අණදෙන නිලධාරී ලෙසත් කොළඹ, වව්නියාව, චීන වරාය, ගුවන් හමුදා පලාලි කඳවුර සහ ගුවන් හමුදා හිඟුරක්ගොඩ යන කඳවුරුවල වෛද්‍ය නිලධාරීවරයා ලෙසත් සේවය කර ඇත.
එයාර් වයිස් මාර්ෂල් ලලිත් ජයවීර ඉන්දියාවේ බැංගලෝරයේ අභ්‍යවකාශ වෛද්‍ය ආයතනයේ ප්‍රාථමික ගුවන් සේවා වෛද්‍ය පාඨමාලාව සහ ගුවන් මනෝචිකිත්සා පාඨමාලාව සහ ඇමෙරිකා එක්සත් ජනපදයේ ටෙක්සාස් හි ගුවන් යානා අනතුරු විමර්ශන පාඨමාලාව ඩිප්ලෝමාව හැදෑරීමෙන් ගුවන් වෛද්‍ය විද්‍යාව පිළිබඳ විශේෂඥ දැනුමක් ලබා ඇත. එයාර් වයිස් මාර්ෂල් ලලිත් ජයවීර මහතා කොතලාවල ආරක්ෂක විශ්වවිද්‍යාලයෙන් MSc (D&SS) උපාධියක් ලබා ඇති අතර ඔහු බටලන්ද ආරක්ෂක සේවා හා මාණ්ඩලික විද්‍යාලයේ උපාධිධාරියෙකි. ඔහු ශ්‍රී ලංකා හමුදා වෛද්‍ය විද්‍යාලයේ සභාපති සහ 2018 වසරේ ජාත්‍යන්තර හමුදා වෛද්‍ය කමිටුවේ ජාතික නියෝජිතයා විය. ඔහු කොතලාවල ආරක්ෂක විශ්වවිද්‍යාලයේ වෛද්‍ය පීඨයේ බාහිර කථිකාචාර්යවරයෙකු වන අතර සිවිල් ගුවන් සේවා අධිකාරියේ සිවිල් ගුවන් සේවා වෛද්‍ය පරීක්ෂකවරයෙකු ලෙසද කටයුතු කරයි.
ඔහු විවාහ වී සිටින්නේ ප්‍රීනි සමඟ වන අතර බිනුක සහ ජනුෂා යන දරුවන් දෙදෙනකුගේ ආදරණිය පියෙකු වේ.
