ශ්‍රී ලංකා ගුවන් හමුදා අනුරාධපුර කඳවුරේ අංක 6 හෙලිකොප්ටර් බලඝණය 2025 මාර්තු 15 වන දින ගෲප් කැප්ටන් ඒ.ආර් පතිරගේ නිලධාරිතුමන්ගේ නායකත්වය යටතේ සිය 32 වන සංවත්සරය සමරනු ලැබීය. 1993 මාර්තු 15 වන දින මිල් එම්අයි -17 හෙලිකොප්ටර් යානා හඳුන්වාදීමත් සමඟ ශ්‍රී ලංකා ගුවන් හමුදා කටුනායක ගුවන් හමුදා කඳවුරේ පිහිටුවන ලද මෙම බලඝණය පසුව 1993 අප්‍රේල් 29 වන දින වවුනියාව ගුවන් හමුදා කඳවුරට ගෙන යන ලදී. පසුව රටෙහි විශේෂ මෙහෙයුම් අවශ්‍යතා සපුරාලීම සඳහා අංක 6 හෙලිකොප්ටර් බලඝණය අනුරාධපුර ගුවන් හමුදා කඳවුර වෙත ගෙන යන ලදී.

සංවත්සරය ආරම්භ වූයේ බලඝණ පරිශ්‍රයේ පැවති සම්ප්‍රදායික වැඩ පෙළපාළිය සමඟින් වන අතර එය බලඝණයේ අණදෙන නිලධාරියා විසින් පරීක්ෂා කරන ලදී.

බලඝණයේ සාමාජිකයින් අතර සහෝදරත්වය හා සුහදතාවය ශක්තිමත් කරමින් එල්ලේ තරඟයක්  පැවැත්විය. සංවත්සර සැමරුමට සමගාමීව බලඝණයේ සාමාජිකයින් විසින් 2025 මාර්තු 14 වන දින කීරික්කුලම ප්‍රාථමික පාසලේදී ප්‍රජා සේවා ව්‍යාපෘතියක් සිදු කරන ලදී. ප්‍රධාන වෛද්‍ය සහ දන්ත වෛද්‍ය අංශ එක්ව කලාප අධ්‍යාපන කාර්යාලය සහ සෞඛ්‍ය වෛද්‍ය කාර්යාලය (MOH) හි සහාය ඇතිව සිසුන්ට, ගුරුවරුන්ට සහ දෙමාපියන්ට අත්‍යවශ්‍ය සෞඛ්‍ය සේවා සපයන වෛද්‍ය සහ දන්ත සායනයක්ද සිදු කරන ලදී.  පාසලේ යටිතල පහසුකම් වැඩිදියුණු කිරීම සඳහා අවශ්‍ය ප්‍රතිසංස්කරණ සිදු කරන ලද අතර, එමඟින් දරුවන්ට වඩාත් හිතකර ඉගෙනුම් පරිසරයක් නිර්මාණය කිරීමද මෙම සංවත්සර සැමරුම මගින් සිදුකරන ලද ප්‍රජා සත්කාරයන් විය.