අම්පාර ගුවන් හමුදා රෙජිමේන්තු පුහුණු පාසලේ පැවති පැරෂුට් පුහුණු පාඨමාලාවේ විසිර යාමේ පෙළපාළිය ‍ ගුවන් හමුදා නියෝජ්‍ය මාණ්ඩලික ප්‍රධානී එයාර් වයිස් මාර්ෂල් ඩේමියන් වීරසිංහ මහතාගේ ප්‍රධානත්වයෙන් 2025 ජුනි 27 වන දින පවත්වන ලද අතර ත්‍රිවිධ හමුදා සහ විශේෂ කාර්ය බලකායේ ජ්‍යෙෂ්ඨ නිලධාරීන් පිරිසක්ද මෙම අවස්ථාවට සහභාගී විය.

AN-32B ගුවන් යානයේ සිට අඩි 1,000 ක උන්නතාංශයක සිට පුහුණුවන්නන් විසින් සිදු කරන ලද පැරෂුට් පැනීමක් සමඟින් උත්සවය ආරම්භ වූ අතර ගුවන් හමුදා ස්කයි ඩයිවර්ස් කණ්ඩායමක් විසින් එම ගුවන් යානයෙන්ම අඩි 10,000 ක ඉහළ සිට පැනීමේ සංදර්ශනයක් පවත්වන ලදී. මෙම අවස්ථාවට ගුවන් හමුදා උත්සවාකාර තූර්ය වාදක කණ්ඩායමේ නිරූපණ සහ සංගීත සංදර්ශනයක් ද ඇතුළත් විය.

පාඨමාලාව සම්පූර්ණ කළ ත්‍රිවිධ හමුදා සහ විශේෂ කාර්ය බලකායේ පුහුණුවන්නන් 98 දෙනෙකු එහිදී නිල ලාංචන පිරිනැමූ අතර මෙම කණ්ඩායමට ගුවන් හමුදා නිලධාරීන් 10 දෙනෙකු සහ සෙසු නිලයන් 44 දෙනෙකු, ශ්‍රී ලංකා යුද හමුදා නිලධාරීන් 4 දෙනෙකු සහ සෙසු නිලයන් 08 දෙනෙකු, ශ්‍රී ලංකා නාවික හමුදා කාන්තා නිලධාරිනියක් සහ සෙසු නිලයන් 21 දෙනෙකු සහ විශේෂ කාර්ය බලකායේ සෙසු නිලයන් 10 දෙනෙකු ඇතුළත් විය.

අම්පාර ගුවන් හමුදා කඳවුරේ අණදෙන නිලධාරී ගෲප් කැප්ටන් ලලිත් සුගතදාස සහ පැරෂුට් පුහුණු පාසලේ අණදෙන නිලධාරී වින්ග් කමාන්ඩර් විජිත ගෝමස් යන මහත්වරුන් සහ පුහුණුවන්නන්ගේ දෙමාපියන් ඇතුළු පිරිසක් සහභාගී වූහ.