ශ්‍රී ලංකා ගුවන් හමුදා පිදුරුතලාගල කඳවුර සිය 16 වන සංවත්සරය 2026 ජනවාරි 05 දින අභිමානවත් ලෙස සමරනු ලැබීය. එදින උත්සව කටයුතු චාරිත්‍රානුකූල වැඩ පෙළපාළියකින් ආරම්භ වූ අතර, අනතුරුව කඳවුරේ අණදෙන නිලධාරී ගෲප් කැප්ටන් චින්තක ජයසුන්දරගේ මඟපෙන්වීම යටතේ නිලධාරීන්, අනෙකුත් නිලයන් සහ සිවිල් කාර්ය මණ්ඩලය එක්ව විවිධ ප්‍රජා සේවා හා විනෝදාත්මක වැඩසටහන් රැසක් සංවිධානය කර තිබුණි.

සංවත්සර සැමරුම් කටයුතු වලට සමගාමීව, 2026 ජනවාරි 04 දින කඳවුරට, එහි කාර්ය මණ්ඩලයට සහ ඔවුන්ගේ පවුල්වලට ආශිර්වාද පතා සර්ව රාත්‍රී පිරිත් සජ්ඣායන වැඩසටහනක් පවත්වන ලදී.

ඉන් අනතුරුව, 2026 ජනවාරි 05 දින සංවත්සරයේ කොටසක් ලෙස කෘතඥතාව සහ අධ්‍යාත්මික පරාවර්තනය සංකේතවත් කරමින් නුවරඑළිය පේන්ටර් නිවාසයේ (ළමා රැකවරණ නිවාසය) දානමය පුණ්‍ය කර්මයක් සංවිධානය කරන ලදී. එම අවස්ථාවේදී එම ආයතනයේ දරුවන් වෙනුවෙන් ශ්‍රමදාන ව්‍යාපාරයක් මෙන්ම වෛද්‍ය හා දන්ත සායනයක්ද පවත්වනු ලැබීය.